Algo estamos tramando...

 

Preme na imaxe para acceder á nova páxina web*

Así luce o expositor da biblioteca para o mes de xuño!

 

🏙️📚 Cidades sostibles, letras galegas e moitas novidades na nosa biblioteca!

Este mes, a nosa biblioteca e o centro en xeral encheronse de vida, música, tradición e aprendizaxe! Todas as actividades organizadas estiveron enmarcadas dentro da conmemoración do ODS 11: Cidades e comunidades sostibles, co obxectivo de fomentar nos máis pequenos o respecto polo entorno, a importancia de construír comunidades inclusivas e o valor da cultura como parte esencial da sustentabilidade.

🎶📜 Dentro deste espírito de comunidade, celebramos tamén unha das datas máis especiais do calendario escolar: o Día das Letras Galegas. Este ano, rendemos homenaxe ás cantareiras galegas cunha xornada moi especial: a nosa propia "Romería das Letras Galegas"!

Durante este día, o centro converteuse nun espazo cheo de tradición e innovación, con actividades para todos os gustos:

🔸 Robótica e programación coas cantareiras
🔸 Obradoiro de panderetas
🔸 Taller de papiroflexia con temática galega
🔸 Recitais de poemas e cancións populares
🔸 Xantar popular con rosquillas incluídas!
🔸 Xogos tradicionais coma os trompos ou a corda.

Foi unha festa da cultura, da convivencia e da identidade galega! 

Foi unha festa da cultura, da convivencia e da identidade galega!

📚🧠 Tamén tivemos novidades na nosa biblioteca!

Este mes ampliamos os nosos fondos e recursos para que todos —nenos, nenas e tamén familias— atopen novas maneiras de aprender e gozar da lectura:

🧩 Engadimos novos xogos ao recanto lúdico, como "Escondite con Monstruos" ou "Super Six", ideais para estimular a memoria, a lóxica e o xogo cooperativo.

📖 Renovamos o expositor de libros cunha nova selección de lecturas adaptadas aos intereses do alumnado e en sintonía coas temáticas traballadas no centro.

👨‍👩‍👧 E, como novidade moi especial, incorporamos unha nova estantería con propostas de lectura para as familias, onde se poden atopar libros sobre educación, crianza e acompañamento emocional. Algunhas das propostas actuais inclúen títulos como:
▫️ "Disciplina sin lágrimas", de Daniel J. Siegel e Tina Payne Bryson
▫️ "Educar sin GPS", de Ares González

Animámosvos a visitar a biblioteca, compartir lecturas en familia e seguir facendo comunidade a través da cultura e da palabra.

Porque entre todos e todas construímos espazos sostibles, humanos e cheos de vida. 🌱📖💫

📰🦜 Xa chegou á biblioteca o novo número do Papagaio!

 A nosa biblioteca xa ten dispoñible a última edición do xornal Papagaio,

unha publicación ilustrada pensada especialmente para a xente miúda con

 ganas de saber, rir e descubrir.

 O Papagaio é un xornal que nos acompaña dende hai anos e que segue a

 sorprendernos número tras número cunha combinación de humor, curiosidades 

e actualidade, sempre posta ao servizo das lectoras e lectores máis novos. Nel

 podemos atopar noticias sobre ciencia, cultura, natureza, deporte e moito

 máis, con especial atención ao que acontece en Galicia.

É unha ferramenta fantástica para ler en galego con pracer, fomentar o espírito

 crítico e manterse informado dun xeito entretido.

📚 Achegádevos á biblioteca e botádelle unha ollada ao novo número.

Seguro que atopades algo que vos sorprende, vos fai rir ou vos dá que pensar.

rque estar informados tamén pode ser divertido… sobre todo se é da man do Papagaio! 🦜💬

 

 

🔬🧪 A ciencia chegou á biblioteca con "Encarrilados na ciencia"!

Este trimestre, a nosa biblioteca transformouse nun auténtico laboratorio! Grazas á

colaboración co Equipo de Voz Natura do centro, acollimos varias sesións de

experimentos científicos incluídos no proxecto "Encarrilados na ciencia”.

Esta iniciativa nace co obxectivo de achegar a ciencia ao alumnado dun xeito lúdico

e participativo, fomentando a curiosidade, a observación e o pensamento crítico.

Cada trimestre, os diferentes ciclos de alumnos do centro

tiveron a oportunidade de desenvolver un experimento adaptado á súa idade e

intereses.

Durante estas sesións, os nenos e nenas convertéronse en verdadeiros pequenos

científicos: formularon hipóteses, manipularon materiais e descubriron, con moita

ilusión, os segredos que agocha a ciencia cotiá. A biblioteca converteuse nun

espazo dinámico onde “aprender facendo” foi a clave.

📸 Aquí vos deixamos algunhas imaxes das experiencias vividas, que amosan o

entusiasmo do noso alumnado e a riqueza destas actividades tan especiais.

 

Episodio especial de Ameixa Radio

 Compartimos con vós o episodio especial de Ameixa Radio que presentamos aos premios José Hermida da cadena SER. Non fomos premiados na final polo xurado, pero sí recibimos  o recoñecemento da emisora polo gran labor e traballo realizado polo alumnado de 6º todas as mañás amenizando as entrdas do cole e fomentando así a radio, a comunicación, o traballo en equipo, a creatividade, a información e o pensamento crítico.

Lerflix

 Aquí vos compartimos as recomendacións literarias de todos os nenos e nenas de Carril, os libros que máis nos gustan a todos e que decidimos incluir no noso propio Lerflix do cole.

Fai click na imaxe para poder descubrilo!

📚🌿 Celebramos a Semana do Libro co ODS 15 como protagonista!

Este mes, na nosa biblioteca escolar, estivemos de celebración… e de reflexión! Todas as actividades que realizamos xiraron arredor da conmemoración do ODS 15: Vida e ecosistemas terrestres, co obxectivo de concienciar ao noso alumnado sobre a importancia de coidar o planeta e preservar os ecosistemas que nos rodean.

Ao mesmo tempo, quixemos aproveitar esta temática tan especial para celebrar por todo o alto a Semana do Libro e o Día do Libro cunha chea de actividades cheas de creatividade e participación.

📖✨ Intercambios lectores: Os nenos e nenas de diferentes niveis convertéronse en contadores de historias e viaxaron polas aulas do centro para compartir contos cos seus compañeiros. Foi unha experiencia máxica, onde o gusto pola lectura se contaxiou de maneira natural e divertida.

 

🎬📚 Lerflix: Inspirándonos nas plataformas audiovisuais, puxemos en marcha o noso mural "Lerflix", onde o alumnado compartiu recomendacións lectoras a través de cartaces creativos e moi orixinais. Agora, calquera que se achegue pode descubrir novas lecturas grazas aos consellos dos seus compañeiros e compañeiras.

📚🔄 Novidades na biblioteca: Ademais, renovamos o expositor de libros cunha selección especial de títulos relacionados coa natureza, os animais, as árbores e o coidado do medio. E no noso querido "bibliopatio", o carro de libros tamén foi actualizado para que os momentos de lecer sigan sendo ocasións perfectas para mergullarse nas mellores historias.

Seguiremos enchendo a escola de libros, soños e bos hábitos para coidar o noso planeta. Porque ler tamén é unha forma de cambiar o mundo! 🌍💚

Febreiro no Equipo de Biblioteca: Innovación, Ciencia e Novas Aventuras Literarias

O mes de febreiro trouxo consigo unha chea de actividades emocionantes na nosa biblioteca, todas elas aliñadas co Obxectivo de Desenvolvemento Sostible (ODS) número 9: “Industria, Innovación e Infraestructuras”. Este obxectivo, que busca promover o progreso tecnolóxico, o acceso á información e o fomento da creatividade, inspirounos a celebrar a Semana da Ciencia e a conmemorar o Día Internacional da Muller e a Nena na Ciencia (11 de febreiro). 
Durante esta semana, a biblioteca converteuse nun auténtico laboratorio de ideas. Os nosos pequenos científicos e científicas de todos os ciclos e niveis traballaron duro para crear os seus propios experimentos. Despois, compartíronos co resto do alumnado nun espazo especialmente preparado na biblioteca. Foi unha experiencia marabillosa ver como os nenos e nenas explicaban con ilusión os seus “achadegos” e como todos aprendían uns dos outros. A ciencia, a innovación e a curiosidade foron as protagonistas, e demostrámonos que a creatividade non ten límites. 
Pero febreiro non foi só ciencia. Tamén recibimos novas incorporacións literarias que xa están a encantar aos nosos lectores e lectoras: 

• A colección “Escola de Monstros”: Esta divertida colección está a facer as delicias dos máis pequenos. Con historias cheas de humor e aventuras, os monstros máis simpáticos ensínannos que ser diferente é algo especial, ademais de fomentar a comprensión lectora, a creatividade e valroes como a amizade, o respeto e o compañeirismo.  

• A colección "Pillota": Unha aposta pola diversión e a aprendizaxe a través de libros interactivos e cheos de sorpresas. Perfecta para que os nenos e nenas descubran o pracer da lectura dun xeito lúdico.  

• Unha nova colección de libros en lingua inglesa que vai ser unha excelente ferramenta para que os nosos alumnos e alumnas melloren os seus coñecementos noutros idiomas mentres disfrutan de historias emocionantes e ilustracións encantadoras.

A biblioteca segue a ser un espazo vivo, onde a innovación, a cultura e a aprendizaxe se dan a man. Agardamos que estas novas coleccións vos animen a seguir explorando o marabilloso mundo dos libros. E recordade: a ciencia, a lectura e a curiosidade son as chaves para construír un futuro mellor.  

 
¡Seguimos construíndo pontes cara ao coñecemento! 📚✨ 

Xaneiro na nosa biblioteca: un mes para a paz e a renovación

O novo ano chegou á nosa biblioteca cunha serie de actividades e novidades que promoveron valores fundamentais relacionados cos Obxectivos de Desenvolvemento Sustentable (ODS), en particular o de Paz, Xustiza e Institucións Sólidas. Foi un mes cheo de aprendizaxe, colaboración e renovación, no que toda a comunidade educativa participou activamente.

O 30 de xaneiro conmemoramos o Día da Paz cunha fermosa iniciativa colectiva: a creación dun mural conmemorativo no que participaron todas as aulas do centro. O noso alumnado púxose "mans á obra" (literalmente) para expresar o seu compromiso cun mundo máis xusto, solidario e en harmonía. Este mural, que agora decora un dos corredores do colexio, lembra a importancia de construír a paz cada día a través das nosas accións. Se queredes saber máis sobre esta actividade premde no seguinte enlace.

Outra das novidades destacadas foi a renovación da colección de libros e xogos do Bibliopatio. Agora, os períodos de recreo contan cunha selección nova, variada e adaptada aos intereses dos nenos e nenas, ofrecendo novas oportunidades para a lectura e o entretemento ao aire libre.

Ademais, tivemos a sorte de recibir dúas importantes doazóns de libros para enriquecer o noso fondo bibliográfico. Por unha banda, con motivo do Día Mundial contra o Cancro (4 de febreiro), incorporamos da man dunha das nais do colexio de Arealonga un total de 150 exemplares do conto "Cristina y mamá y cómo la palabra todavía es su talismán", pensada para axudar a comprender e sensibilizar sobre o tema. Por outra banda, recibimos a colección en inglés "The Classic Collection", que inclúe marabillosos contos clásicos como Cincenta ou Branca Neves e os sete ananiños. Estes novos títulos permitirán ao alumnado achegarse á literatura universal e mellorar as súas competencias en lingua inglesa.

Desde o equipo de biblioteca, queremos agradecer a implicación de todos os que fixeron posible este mes cheo de novidades e aprendizaxe. Seguiremos traballando para facer da nosa biblioteca un espazo vivo, cheo de recursos e propostas enriquecedoras.

Seguimos lendo, aprendendo e construíndo un mundo mellor! 📚✨

Recomendacións lectoras para as vacacións de Nadal

 

Decembro na nosa biblioteca: solidariedade, aprendizaxe e diversión

O mes de decembro chegou cargado de actividades no noso colexio, todas elas organizadas coa intención de fomentar valores como a solidariedade e a cooperación, ademais de contribuír ao cumprimento dos Obxectivos de Desenvolvemento Sustentable (ODS), en particular os relacionados co Fin da pobreza e Fame Cero.

Unha das iniciativas máis destacadas foi a donación de alimentos non perecedeiros. O alumnado participou activamente nesta acción solidaria, colaborando coa organización Cáritas para axudar ás familias que máis o necesitan. Grazas ao esforzo conxunto de toda a comunidade educativa, logramos recoller unha importante cantidade de alimentos que farán destas festas un pouco máis cálidas para moitas persoas.

Por outra banda, os nenos e nenas de 4º de Educación Infantil deron renda solta á súa creatividade coa gravación do podcast mensual. Este proxecto, no que compartiron as súas reflexións sobre temas relacionados cos ODS e as actividades do colexio, converteuse nun espazo para escoitar as súas voces e ideas.

Ademais, durante os recreos, o alumnado gozou da actividade de Cine no recreo, unha oportunidade para ver películas cheas de valores que fomentan a empatía, o traballo en equipo e o respecto. Esta iniciativa non só foi un momento de lecer, senón tamén unha forma de aprender dun xeito diferente.

Para pechar o mes, celebramos o tradicional festival de Nadal, onde os diferentes grupos de alumnos e alumnas nos agasallaron con actuacións cheas de música, baile e maxia. Foi unha xornada inesquecible que puxo de manifesto o talento e a ilusión dos nosos pequenos artistas.

Desde o equipo de biblioteca, queremos agradecer a implicación de todo o alumnado, profesorado e familias que fixeron posible este mes tan especial. Seguiremos traballando para que a nosa biblioteca sexa un espazo de aprendizaxe, solidariedade e creatividade para todos.

Desexámosvos unhas felices festas e un próspero ano novo! 🎄✨

Nadal solidario

Pancho e Flora nos traen unha proposta para ter un Nadal máis solidario.

A semana do 9 ao 13 de decembro levarase a cabo unha recollida de alimentos non perecedoiros.  O que máis se necesita son ovos, aceite, legumes, arroz, leite, ou produtos enlatados.

Os nenos e nenas poden deixar a súa doazón na aula de Relixión Evanxélica de 9:00 a 9:15. 

Todos xuntos deixamos pegada! 

O mes de Novembro na Biblio

Novembro no cole de Carril estivo marcado polo Obxectivo de Desenvolvemento Sustentable que escollemos para este mes: Igualdade de Xénero. Aproveitando a conmemoración do 25N (Día Internacional da Eliminación da Violencia contra a Muller) desenvolvimos unha chea de iniciativas ao redor dos valores de igualdade que podedes ver a continuación. 

Comezando pola proposta que dende a colección da nosa biblioteca temos para ofrecer sobre a temática da igualdade de xénero. No expositor da biblio os nenos e nenas do colexio tiveron unha morea de libros destacados coma os que vos deixamos por aquí.

Seguimos coa gravación do posdcast que mensualmente cada nivel estará realizando relacionado con cada ODS. Este mes foron os alumnos e alumnas de 3º de Primaria os encargados de levar o timón e temos que dicir que o resultado quedou ben xeitoso! 

Por outra banda, en sexto de Primaria participaron da man de Aquelar Sexoloxía nun obradoiro sobre violencia de xénero no que traballaron os estereotipos de xénero, a violencia machista en todas as súas formas así como actitudes machistas do día a día sobre os que puidemos reflexionar. Se queredes saber máis sobre esta actividade, botádelle un ollo ao Instagram do colexio en "ceiprosalia_carril". 

A continuación destacamos a actividade que argallaron dende o Equipo de Igualdade do centro para celebrar o 25 de novembro: un "cover" da canción La puerta violeta de Rozalén pero en Lingua de Signos Española! Entrade na páxina web do centro para poder velo! 

Por último destacamos outras accións coma o mural de "La puerta violeta" nun dos corredores do colexio, o "buzón violeta" ou outras actividades desenvoltas a nivel de aula que tamén nos axudaron a visibilizar e tomar conciencia da Igualdade de Xéneros.

Nada máis polo de agora! Despedímonos ata o vindeiro mes de decembro! Avur!

Genially dos ODS

Boas de novo!
Se premedes AQUÍ vos deixamos o Genially dos ODS onde podedes consultar os episodios mensuais de Ameixa Radio e todo o que estamos aprendendo. No mes de outubro centrámonos no ODS número 3: saúde e benestar e neste mes de novembro imos abordar a temática da igualdade de xénero. Vémonos axiña!

Estreamos Bibliopatio!

Boas de novo! Este mes de outubro estrenamos o Bibliopatio nos recreos! É un carriño viaxeiro que contén libros, cómics e xogos para todo o alumnado e que está xestionado polos Biblioaxudantes de 5º e 6º. Tivo moi boa acollida, desfrutamos das lecturas e xogos co bo tempo e dinamizamos o noso patio! Vémonos deseguido!

Mochilas viaxeiras

Boas de novo! Aproveitando o Día das Bibliotecas Escolares, Pancho e Flora decidiron poñer en marcha as mochilas viaxeiras cara os fogares de todos os nenos do cole. Que teñades boas lecturas!

Día das Bibliotecas

Boas de novo! O 24 de Outubro celébrase o Día das Bibliotecas Escolares e como non podía ser doutro xeito a biblioteca de Pancho e Flora foi lugar de acollida para unha foliada con integrantes do Coro de Carril. A mestra Pilar Garrido visitou o noso cole para cantar a foliada de Carril, a saia da carolina, o coro da fala e moitas máis cantigas que fixeron que nesta data tan especial a biblioteca estivese chea de música e tradición. Podedes atopar máis información desta actividade na nosa páxina de Instagram e na web do centro.

Presentación da temática deste curso

Boas a todos e a todas de novo! Este ano o proxecto da nosa Biblioteca tratará sobre os obxectivos de Desenvolvemento Sustentable. Os obxectivos de desenvolvemento sustentable son unha lista de 17 prioridades globais adoptadas pola Organización das Nacións Unidas (ONU) e polos países que a forman. O que se busca con estes é:erradicar a pobreza, protexer o planeta e asegurar a prosperidade para todos e todas. Ao longo deste curso iremos vendo como podemos incorporar estos obxectivos na nosa vida e contribuir ao seu cumprimento. Todos xuntos deixamos pegada!

Recmendacións lectoras para o verán

Chegaron as vacacións de verán e con elas máis tempo libre para ler! Recordade...os libros son os mellores compañeiros de viaxe! Pancho e Flora decidiron deixarvos tamén algúns xogos para seguir compartindo tempo en familia estemos onde estemos. Bo verán a todos e todas!